يا برهان
منو القال ليك
بنقبل بيك
ونقبل لي وطنَّا هوان
كفايه خلاص
تولِّع في قلوب الناس
مناقد من لهيب ظلمك
وأوهام خاليه من احساس
منو القال ليك
حا نسمع ليك
منو القال ليك
حا نسمح ليك
تغبِّش وعينا الأنضر
تأخِّر سعينا الأخضر
وتهدم عِزة السودان
طلقت كلابك الضَّالَّه
على شموس الوَعِى الطَّالَّه
صدور مليانه بالإيمان
قلوب بتواجه الشيطان
مليشياتك صايله فينا عيان
ومافي أمان
من الرصاص من البنبان
وهسع بالطواري كمان
قصدت تحطِّم الإنسان
أسمع كلامنا عديل
نهايتك شارفت بالحيل
أحسن تكون فاكر
نهايتك آخر الأحزان
وبينا وبين أمل باكر
مشاعر ثوره حتميه
ثوره بتدق في الباب
لا حزبيه لا جهويه لا قبليه
ما مهتمه بالألقاب
شباباً زي أسود الغاب
بينُم وبين الأمل ميعاد
وليهم للوطن ميلاد
بيسوقوا خطاهو للأعياد
غناهم للبلد أمجاد
حروف من لهفه من أشجان
طيوف من فرحه من ألحان
منو البقدَّر يوقِّف زحف
منو البقدَّر يشق الصَّف
ونحنا شبابنا حالف ألف
يخوض الصَّي
يجيب الضَّي
ويمسح عنَّنا الأحزان
تفوت إنت ونشوف غيرك
وغيرك لو مشى في سيرك
نفوتوا ونمشي لي غيرو
املنا بلدنا يبقالنا ونضوق خيرو
ترفرف رايه خفَّاقه
وندندن نحنا عُشَّاقا
نذوب في سمح اخلاقا
عداله سلام وحُرّيه
ترفرف رايه وطنيه
وتهزم كل قبليه
وما في هويَّه غير انسان
جروح الماضي نشفيها
وبالسلمية نطويها
حروبك يا زمان الظلم نطفيها
ونفتح للسلام الباب
هتافنا بعزة الاوطان
نصونك إنتا يا سودان
نعلِّي مكانة الإنسان
ونصبح في الوطن أحباب
شارك هذا الموضوع: