ومشيت معاك..
لي بكرة ،
فى كل النصوص العارفة
سالمت اليقين
والإحتمال والصبر
لميت النضم
عن أمسنا
المغلوب؛
وعشيت العيال ..
بي فكرتك؛
بالهمسة؛
باللمسة الطفيفة
على كتف ممكن
ومعقول
وكيف وليه…؟؟
ما كان معاي الخوف
معاي شجنك
وخيل محنك
ركضت
ركضت فيني
كل الخيبة
لافيتا وقعدتا حداها
حد يسكر هسيس الظن.
بإنك مافى
مجرد قافية
فى شعر الصعاليك
التنابيك
والبناطلين الكأنها ناصلة
لكن الحزن ود كلب..
مرق لاقاني بالأحضان
شرق فرح المتيرب
فى إنتظاري إليك .
كأنك ما شرد من قلبك
التسبيح
كأني ذبيح
وهادا المتسع للشوف
كأنو مسيح..
وما هماك
ولا يمكن إذا ما طارفت
أشواقك الطيبة
معاني هواك..
تليدة كأنما الروح
يا بليد…
وشوف شموسك
ما نجاسة أرض
فى روح الصلاة
شوف نفوسك
ما بتكوسك
كلما عزت نجاة.
بس بتعرف
مين نجوسك
وكيف يخوسك
لو كانت الأشواق
بدونك
فى رحى الموت
مرتجاه….
شارك هذا الموضوع: